Аки Рахимовски постхумно ќе добие „порин“ за животно дело

Првата од годинашните хрватски музички награди „порин“, наградата за животно дело, постхумно ќе му биде врачена на легендарниот лидер на „Парни ваљак“, Аки Рахимовски.

– Поради сплет на несреќни околности, годинашната прва награда за животно дело „порин“ му се доделува постхумно, предоцна и сè уште под впечаток и во тага, на Аки Рахимовски – пишува на официјалната интернет-страница на наградите „порин“.

Како што објаснија од хрватското музичко друштво „Унисон“, постои златно правило кога се доделува наградата „порин“ постхумно, а познато е дека може да ја добијат само оние што навистина ја заслужиле со својата голема кариера, а не ја добиле додека биле живи само затоа што сѐ уште биле премногу активни, успешни и млади.

Тие во својата изјава објаснија како ова признание му припадна на Аки.

– Едноставно, сè уште не му беше редот да се качи на сцената на „Порин“ и лично да му се врачи долго заслужената награда за животно дело – велат тие.

Аки беше некој што почна од нула, а потоа влезе во историјата на хрватската рок-сцена. Роден е во 1955 година во Ниш, а многу брзо потоа се преселил во Скопје. Бидејќи неговиот татко бил професор по музика, Аки започнал да оди во музичко училиште на седумгодишна возраст, посетувајќи пијано и пеење.

Бил член на повеќе музички состави, но за неговиот животен успех е заслужен моментот кога заедно со Хусеин Хасанефендиќ-Хус, кого го запознал во 1975 година, и Јурица Паѓен го основал „Парни ваљак“. Групата важи за еден од најголемите бендови во поранешна Југославија, а до денес има издадено над 15 албуми и има одржано илјадници концерти низ светот.