Адеми: Португалците се опасни од сите страни, ама ќе најдеме решение за нив

28.03.2022 Mart Ponedelnik

Португалија е последниот противник за нашата фудбалска репрезентација за испишување на нова историја, пласман на Светско првенство.

Средбата се игра утре од 20:45 часот во Порто, а на Македонија потребен и е уште еден голем резултат на гостински терен како против Германија и Италија за да патува во Катар. Аријан Адеми има искуство со големи средби во кариерата, но е оптмист дека ќе одговориме на најдобар начин иако не заборава да посочи дека четата на Сантош е поопасна од италијанската која ја шокираа во Палермо.

-Сите знаеме каква репрезентација е Португалија, за мене има голема разлика со Италија во однос на индидуалниот квалитет. Португалците се опасни од сите страни, ќе биде тешко да се игра, ама сигурен сум дека ќе најдеме вистинско решение за нив, ќе дадеме се од себе да се пласиме на СП, -истакна Адеми за „Ал Џезеира“.

Во однос на тоа дали е подобро што ова финале се игра на теренот на противникот и тоа што целиот притисок ќе биде врз нив, капитенот на Динамо Загреб рече дека одговорот ќе го дознаеме по мечот во Порто.

-Ќе видиме кога ќе заврши што е подобро. Атмосферата ќе биде одлична како во Палермо, ама на секој играч му е сон да игра пред таква атмосфера. Ќе ни беше сигурно подраго да играме дома, меѓутоа тоа е што е, ќе дадеме се од себе за да ги изненадиме, -рече Адеми кој запрашан дали ја гледа Македонија во Катар директно порача:

-Секако дека ја гледам, -истакна големиот борец.