Австралиските научници пронајдоа необичен објект што ротира во Млечниот Пат

Австралиските научници тврдат дека откриле непознат објект, невиден досега, кој ротира во Млечниот Пат, пренесе „Гардијан“.

Овој објект не наликува на ништо што досега им е познато на научниците, а прв го откри студентот на универзитетот „Куртин“, Тајрон О’Доерти, кој забележа огромно ослободување радиоенергија, која траеше по цела минута на секои 18 минути.

Тој користеше телескоп и нова техника што самиот ја развил, а инаку беше дел од тимот предводен од астрофизичарката Наташа Харли Вокер од Меѓународниот центар за истражување на радиоастрономијата на универзитетот „Куртин“.

Предметите што пулсираат, се вклучуваат и исклучуваат, често се документирани во вселената, меѓутоа, според истражувачите, не се случува често нешто да свети една минута на секои 18 минути.

Објектот е оддалечен 4.000 светлосни години од Земјата, исклучително е светол и има исклучително силно магнетно поле. Теориите за тоа што би можел да биде објектот вклучуваат неутронска ѕвезда или „бело џуџе“ – термин што се користи за остатоците од колабирана ѕвезда.