„Аватар“ руши рекорди: „Патот на водата“ на пат да го надмине првиот дел

„Аватар: Патот на водата“ (Avatar: The Way of Water) во режија на Џејмс Камерон, инаку второ продолжение на научнофантастичната сага „Аватар“ се искачува на скалата на киноблагајните и се очекува да надмине 2 милијарди долари во продажба на билети во наредните денови. Тоа, ова остварување го прави меѓу филмовите со најголема заработка на сите времиња заедно со оригиналниот „Аватар“ и „Титаник“, двата под режисерската палка на Камерон. Ова е трет филм на режисерот Камерон, кој надмина 1 милијарда долари, што го прави втор режисер со највисока заработка досега зад Стивен Спилберг.

„Благајните од наша перспектива ни овозможуваат да продолжиме. Тоа дава моќ“, изјави Камерон за „Ројтерс“.

Познатиот режисер веќе снима трет филм од серијалот „Аватар“. „Создавањето два последователни филма сега ќе се исплати, тоа е добро чувство“, додаде тој.

Во „Патот на водата“, Џејк Сали живее со своето ново семејство на планетата Пандора. Откако се враќа познатиот непријател за да ја доврши работата што ја започнал, Џејк мора да работи со Нејтири и армијата Нави за да ја заштитат планетата. Улогите ги толкуваат и повторуваат: Сем Вортингтон, Зои Салдана, Сигурни Вивер, Стивен Ланг, Клиф Кертис. Најновиот филм на Камерон,

„Аватар: Патот на водата“, сè уште може да се погледне и во скопските градски кина. Филмот беше премиерно прикажан на 16 декември, а со моменталната заработка продолжението е на пат да го постигне истиот успех како и оригиналот од 2009 година. Впрочем, оригиналниот филм „Аватар“ моментно е филм со најголема заработка на сите времиња. Овој блокбастер има инкасирано над 2,9 милијарди долари.

И додека „Аватар: Патот на водата“ поставува рекорди, режисерот Камерон ги заби рацете и нозете во цементот пред киното ТЦЛ (TCL) во Холивуд за да го одбележи својот придонес во филмската индустрија.