Три селекции од соседството се пласираа на ЕП

Репрезентацијата на Хрватска прва обезбеди пласман на Европското првенство (ЕП) во 2022 година во кошарка, откако ја совлада Шведска со 87-72, во групата Д. По истите стапки тргна и БиХ. Избраниците на селекторот Ведран Босниќ во квалификациите двапати ја победија Летонија (62-61 и 79-73) и Бугарија (88-49), а единствениот пораз беше од Грција (65-70), која, исто така, се пласира на ЕП 2022. Словенија е речиси пласирана на ЕП, каде што би ја бранела титулата освоена во 2017 година. Има уште пет селекции што можеа вчера да ги потврдат своите пласмани, во групите А, Б, Е и Ф, на турнирите во Еспо (Финска), Љубљана (Словенија), Валенсија (Шпанија) и во Талин (Естонија), по одиграните натпревари. Во групата Б, каде што е и Македонија, освен Италија, која веќе е квалификувана како кодомаќини, ниту една друга селекција не е сигурна. Но евентуална победа на Русија над Италија, во мечот што требаше да се игра вчера, ќе ѝ обезбеди место и на Русија на ЕП. Европското првенство требаше да се одржи во септември 2021 година, но поради пандемијата на ковид-19 е одложено за септември 2022 година.