Чави нема сомнеж кој е негов наследник на „Камп Ноу“: Тој ќе одбележи една ера во Барселона!

Чави Ернандез се споменува во листите на претседателските кандидати за претстојните избори кои ќе следат во Барселона, или поточно, се очекува да биде важно име во кампањата на Виктор Фонт кој се издвојува како главен фаворит за победа и наследник на Бартомеу.

Всушност, на легендарниот капитен на Барселона се гледа како на иден тренер на првиот тим и Фонт најави дека негова победа ќе значи и тренерска смена на „Камп Ноу“, но во период во кој се очекува легендарниот играч за врска да биде често споменуван во јавноста, тој даде и една интересна изјава поврзана за својот наследник во актуелниот состав на Барса.

Иако Чави не сака да се прават никакви споредби меѓу него и Де Јонг, повеќе од јасно е дека Холанѓанецот е своевиден негов наследник според позицијата на која игра, а Ернандез нема сомнеж дека младиот Френки ќе испише историја во клубот во годините кои претстојат.

– На Де Јонг гледам како на играч кој ќе одбележи една ера во Барселона. На следниот Мундијал кој ќе се игра во 2022-ра година, тој ќе биде еден од најдобрите играчи на Холандија, во тоа воопшто не се сомневам.

– Тој се уште е многу млад, станува збор за извонреден фудбалер. Нема страв да ја прими топката во тешка зона на теренот и да продолжи да ја носи напред, а тоа многу ми се допаѓа кај еден фудбалер, – објаснува Чави.