Хамилтон ги загрижи фановите: Не знам дали ќе бидам во Ф1 следната сезона

Луис Хамилтон ја продолжи доминацијата во Формула 1 и на патеката Имола, па сосема извесно е дека и оваа сезона ќе освои уште една титула во болидот на Мерцедес.

Британецот засега го нема продолжено договорот со својот тим, но барем досега беше јасно дека не постои реален простор, ниту потреба да ја менува средината по објавените планови на другите тимови.

По денешната трка, Хамилтон ги загрижи своите фанови, со изјавата дека се уште не е сигурен дали ќе се натпреварува во Формула 1 и следната сезона.

– Јас се уште не знам дали јас ќе бидам во тимот, па затоа и останувањето на Тото Волф воопшто не е моја најголема грижа, – изјавил Хамилтон на прашањето дали очекува Волф да биде тимски шеф на Мерцедес и следната сезона.

– Би сакал да бидам тука, но не можам да го гарантирам тоа. Има многу работи што ме возбудуваат за животот по Формула 1, па затоа времето ќе покаже, – изјавил Хамилтон.